香港人工作時間出名長，人生一大部份時間都佔據咗喺工作上。由於我哋會喺工作上投放大量嘅時間，所以我哋更加應該享受工作。當一份工作開始帶唔到快樂和成功感畀你嘅時候，甚至開始慢性扼殺你嘅熱情同創意，咁你就要開始考慮吓係咪要辭職、轉換下環境。如果有以下五個徵兆，代表你份工為你帶嚟好多負面影響，快啲睇吓你中咗幾多個啦！

1. 缺乏動力

有無試過朝早飲咗幾杯咖啡，每日返工嘅路上都仲係好似行屍走肉咁？又或者你開始對會議室發生嘅事都漠不關心？如果講中咗你嘅情況，證明你已經開始對工作失去動力，不再全情投入喺工作上。咁會好影響你嘅表現，仲會對你嘅關鍵績效指標（Key Performance Indicator）有相當大嘅負面影響。雖然呢個徵兆有可能係倦怠期嘅表現，不過你都應該反思一下，誠實咁面對自己嘅諗法，睇下自己係唔係係要轉換下環境，為自己帶嚟新嘅衝擊。

2. 壓力爆燈

失眠、睡眠質量差、容易發脾氣等，都係壓力太大嘅症狀，而壓力嘅來源往往都係工作。當人承受過大壓力時，會好影響生活，如無及時發現，長期受呢啲問題影響，最後有可能演變成為抑鬱。如果發現自己身體響起警號，應該重新考慮你生活嘅優先次序，試下將工作放到一個比較低嘅位置，放鬆吓自己。

3. 失去自我價值

即使工作唔順利，被上司或身邊嘅同事無視，都唔好因為咁貶低自己嘅價值。如果你嘅諗法同建議，長期都被上司否決，你就應該諗下問題嘅徵結係邊，上司作風太保守？公司唔鼓勵變化？如果你有好嘅建議，但長期都被人輕視或否決，你就應該好好諗下係唔係時候搵一個接受你諗法嘅地方，等你可以好好發展所長。

4. 工作與生活失衡

如果你日日都要ot，搞到你無曬同朋友相處嘅時間，咁就要重新思考下你嘅工作同生活之間係唔係平衡。工作當然重要，但都唔可以完全佔據我哋嘅生活。我哋依靠同其他人嘅互動去維持精神及心理健康，因此辦公室外嘅社交生活對我哋好重要。缺乏正常嘅社交活動會令我哋心理造成壓力，甚至抑鬱。如果你工作時間太長，搞到你無曬私人時間，咁你就要諗下係唔係時間辭職，搵過份工作量較小嘅工，等自己有返生活。

5. 害怕改變

好多時我哋其實知道自己，係時候要作出改變，辭職改變一下環境，但礙於我哋害怕踏出Comfort Zone，所以慢慢都唔敢行動。其實未知嘅未來唔一定可怕，有時候要有改變先可以帶嚟衝擊，擴闊自己嘅眼界。不妨將害怕嘅事情白紙黑字寫落嚟，你就會發現自己可以應付得嚟，咁恐懼漸漸就會消散，也就不需再害怕作出改變。