Google嘅辦公室以羨煞旁人聞名，有開放式辦公室、充滿創意嘅設計。做到餓餓地，可以打開雪櫃隨便攞嘢飲，再去食到你爆瘡嘅零食區任食，拎包卡樂G食完再博殺。然後做到悶悶地，仲可以走去開部次世代主機，搵個同事踢返場波。另一間企業Airbnb，將辦公室設計到好似去旅行嘅民宿咁，直頭令員工返工好似去旅行，唔駛請假去旅行（而家直頭Office都未必使返）。講返香港大部分嘅公司，設計上大部分都比較傳統，沒有開放式辦公室，只有一格格四四方方嘅partition，封印住打工仔嘅靈魂。

有時開會開足一日，行出會議室已經5點幾，返到埋位坐喺堆富士山級文件山下，真係好想隨緣地拋下便逃走，事實係逃走明天更夜走。當打工仔臉如死灰之際，見到同事喺隔兩個partition嘅位置，喺度興高采烈咁吹緊水，細聲講完又大聲笑，即刻過去吹埋一份放鬆下。公司雖然有機打有嘢食，但識得自製Happy Corner，舒緩一下工作氣氛都好重要。打咗工咁耐，發現辦公室裡面必須備有幾個Happy corners，先至冇咁易做到人都癲。

1. 零食corner

一日返工隨時可能講緊十幾粒鐘，食完個晏3點3又冇時間食tea，呢個時候點到要搵啲嘢咬下先有能量繼續博殺。零食喺辦公室就好似空氣一樣嘅存在，一個辦公室可以冇咗老細，但絕對唔可以冇咗零食。就算公司冇公數買零食，打工仔都要夾錢自製一個零食Happy corner，擺滿異國特色嘅零食，以解隨時OT冇飯食之苦。

2. 吹水corner

我曾經夜晚去過一個好多人OT嘅辦公室，入面死氣沈沈，間唔中會聽到下啲紙聲、鍵盤聲、寫嘢聲、打哈欠聲。明明成個office都係人，但就唔會聽到有人講嘢，一陣冷氣陰風吹埋嚟，恐怖過海馬公園啲鬼屋。一個辦公室需要一個能夠增加人類氣息嘅吹水corner，可能係零食corner嘅旁邊，可能係某個最吹得嘅同事個位。成個office一片死寂，返工心情都好死寂。

3. 食飯corner

Google呢啲公司嘅辦公室就有好多開放工作間，畀你可以同其他同事開開心心一齊食餐飯。喺香港公司地方淺窄，無論帶飯定叫外賣嘅朋友，好多時都要坐返喺自己個位度食。不如搵間會議室又好，窄窄地搵個同事個位又好，開拓個食飯corner，同班同事叫外賣返嚟嘻嘻哈哈食個lunch，舒緩下情緒啦。

4. 講是非corner

講是非corner同吹水corner唔同，吹水係傾下閒計，講下「今日天氣好好」、「樓下間壽司好好食」嘅地方，但講是非corner係一個莊嚴、閒人免進嘅聖地。呢個地方一定要夠隱蔽，千祈唔好學電視劇咁揀廁所，因為廁格明明冇鎖都會有人走出嚟。呢個corner比起吹水corner更重要，因為係保持工作間心理平衡嘅關鍵。

有呢啲Happy Corners之後，諗返轉頭，其實辦公室冇設計得咁「Google」都有好處，因為你冇咁易「樂而忘返」。