Career Advice 名家分享

年尾Appraisal 點叫公司加人工?

又到咗年尾,又喺一眾打工仔收成績表嘅時間,千祈唔好以為你做成點老細已經心裡有數,其實Appraisal 做得好唔好,都會直接影響你升職或加人工嘅結果。想趁Appraisal 嘅時侯開口叫公司加人工,但又唔知點做?快啲睇以下四點學吓嘢啦!

 

  1. Show 今年成績

 

要得到上司賞識,一定要有兩手準備。見面前,可以先寫低自己過去一年嘅成績,例如籌備過咩活動、服務過咩客戶、創造咗咩成就、贏過咩獎、得到咩新客戶或落實咗咩新計劃等等,最好係可以量化嘅成績,用數據去証明你嘅工作能力。

 

  1. 對未來表現積極

 

除咗今年成績外,你亦應該喺Appraisal 嘅時候,借機會同上司爭取表現。你應該對未來表現積極,指出喺未來一年自己有咩目標、有咩空間可以跟進或有咩方面想發展,增加升職同加人工嘅機會。


 

  1. 諗好點講

 

雖然Appraisal會議應該係由上司主導,但都應該先整理一下有咩要反映或表達。無論係正面或負面意見,都應該諗吓點舖排,唔好太直接講出你見到嘅問題,可以婉轉表達,等大家聽落都舒服啲。


 

  1. 聽吓上司口風

 

當你提出升職、加人工要求時,公司可能會提出好多理由拒絕你。如果公司態度明確,你都無謂再堅持自己嘅要求,反而可以探吓上司口風,可能當中會暗藏機會,又或者可以同上司商討,訂立一個短期目標,只要合乎要求,就可獲得升職或加人工機會,趁機會好好調整一下雙方嘅預期。