Career Advice 名家分享

日日OT唔捨得收工?你可能變咗「工作狂」!

點先算係「工作狂」? 好多人以為經常OT就等於「工作狂」,其實唔係!「工作狂」又稱工作成癮(Workaholic),指一個人強迫自己長時間工作,唔識將工作同生活分開,收工之後都無辦法放鬆,不停諗工作上嘅事,令到自己壓力好大(開始WFH policy之後可能仲嚴重咗)。

 

變成「工作狂」嘅原因有好多,例如太在意上司同事對自己嘅評價,希望透過工作表現得到肯定,又或者因為經濟壓力唔可以無咗份工,唯有不停工作爭取表現。

 

「工作狂」睇落只係不停工作,問題唔大,但工作成癮會影響人際發展,導致患者遠離群體變得孤僻,更加有機會引致心理同慢性疾病等健康問題,嚴重起上嚟仲會過勞而死,所以絕對唔可以輕視。

 

驚自己係「工作狂」? 睇下有無以下特徵啦:

  1. 經常諗點樣將時間放喺工作上
  2. 工作時間比預期多
  3. 努力做嘢可以減輕罪疚感,焦慮感
  4. 有人建議你減少工作,但會唔耐煩
  5. 如果無工作喺身會覺得好大壓力
  6. 因為工作關係,你漸漸變到唔鍾意去玩同做運動
  7. 因為工作量大令你有健康問題

 

睇完發現自己有工作成癮嘅問題,有5大方法改善!!

1. 設定「休息時間」

「工作狂」經常不停做嘢唔休息,所以應該訂立一個放低工作嘅時間,例如: 夜晚7點後就唔再做嘢,而且要貫徹始終,「休息時間」就一定唔可以工作。

 

2. 安排放工後嘅活動

嘗試安排放工後嘅活動,例如: 同朋友聚會,運動等,令自己嘅注意力可以聚焦喺其他活動上面,忘記工作上嘅事,同時refresh下自己。

 

3. 同上司同事建立互信

「工作狂」通常都會將所有工作攬上身,覺得所有工作都要親自處理先會做得好。不如嘗試信任身邊嘅上司同事,有需要嘅時候就搵佢哋幫手,咁樣唔單只可以提高效率,更可以同上司同事建立更好嘅關係。

 

4. 重新檢視自己嘅價值

工作並唔係定義你嘅唯一價值,唔需要將所有心力都投放喺工作上。除咗工作之外你亦可以投入喺其他興趣搵滿足感,畫畫、唱歌、做運動,甚至Shopping食好西都得。

 

5. 轉工

成為「工作狂」可能係因為而家呢份工畀你太大壓力,令你好驚無咗份工。不如試下嚟呢度搵返份Work-Life Balance嘅工啦!