踏入6月，多咗好多畢業生見工，同佢地傾吓計，聽吓佢地嘅想法，確實可以擴闊自己嘅思維。

而同其中一位畢業生傾得甚為投契，我講到自己工作咁多年，做過唔同行業同類型嘅公司，佢突然間問我，其實第一份工，究竟應該揀Agency定In-house好？因為同學之間對Agency同In-house嘅睇法都好唔同。

因為我無預計過會有Candidate問呢條問題，所以自己都答得唔好，依家重新整理再寫一次出嚟，希望可以啟發到還在考慮中嘅朋友。

你問我Agency同In-house有乜唔同嘅話，我會答你Agency要同時面對好多唔同行業 ( 即係好多客 ) 嘅需求 ，而In-house就係專心一意做好公司盤Business，呢個應該係兩者嘅最大分別，而同時會產生咗好多唔同嘅效果。

1. 機會
Agency其中一個好處就係機會多，點解？原因係面對嘅客比較多。假設你做嗰間Agency有三個客，如果你比心機做得好上晒手，你老細自自然然就會放手分一個客比你自己跟 ( 無論好╱壞老細都會 )，呢個時候就係你表現嘅機會啦，因為當你全權負責嘅時候，你嘅Idea會得以發揮，做事會更加得心應手，處理嘅範圍較廣睇嘢亦都會更闊，比起初入In-house只係揼石仔同做手板眼見工夫，你可能已經儲落一堆Senior嘅經驗，就算唔升職，呢類經驗對於你將來轉去更高職位係好有幫助。

2. 見識
但如果講到見識，入大公司In-house就一定比Agency好，雖然In-house多數會分派好晒要做嘅工作比你，你要謹守崗位，發揮空間不大；但另一方面，因為In-house或者一個品牌，其實佢地已經有既定嘅獲利模式，所以先唔可以比你亂嚟。入到In-house，你可以觀摩佢地嘅營運方式，汲取每個崗位嘅處事手法，成為自己嘅經驗。無錯係In-house只靠睇不及在Agency落手做嘅經驗咁實在，但係In-house望到嘅會更高更遠。

3. 福利跟工作氣氛
福利嚟講，就一定係In-house好得多……薪金較高，假期較多，醫療保障好，環境又較靚，有完善嘅Carrer pat。我做過一間公司，雪櫃有支裝可樂任飲，夏天返四日半工，真係感覺良好 ( 可能比起其他更大型嘅In-house又好弱雞 )，所以福利呢一點Agency真係無得比。但又咁睇，因為In-house嘅發揮機會少，即係晉升嘅機會都比較少，相對勾心鬥角嘅情況比較多，人事較為複雜，而Agency好多時都抱住「搞得掂個客就OK」嘅狀況，槍口向外，一班同事都會好團結，做嘢齊心協力，關係簡單事非少 ，工作氣氛自然會好得多。

4. 工作時間
有人話Agency有返工無放工，但跟據過往經驗，其實只要旺季一到，Agency同In-house都一樣爆OT，而 In-house有時會因為人事問題，OT得仲恐怖添呀！

其實Agency同In-house永遠係互相幫助嘅關係，Agency當然要靠In-house養活。但同樣地，In-house因為有既定嘅獲利模式，好多時有好多制肘唔敢創新，要靠Agency幫佢哋突破行業嘅框架，所以我認為無邊一樣特別好，相反應該要汲取晒兩邊嘅經驗，發展先可以更加順暢。

而第一份工，應該揀 Agency定In-house？我認為第一份嘅關鍵位，係如何令自己盡快擺脫Junior變身成為Senior。所以如果認為自己係搏殺型，不妨揀Agency，幫一、兩個客做出成績，Title上會較易作出突破。相反，穩陣型嘅你，可以係In-house內留多一陣，雖然Title上未必夠Agency升得快，但花多一兩年時間，升職一定有機會，而HR較為欣賞係In-house升過職嘅求職者，因為咁樣代表有一定嘅能力、毅力同耐性。

希望呢個小小嘅分享，可以幫到仲係十五十六嘅朋友啦！