作為老細或者管理層，你有冇諗過點解大家夾得好哋哋，但喺下屬突然間辭職呢？有冇諗過其實佢哋忍咗你好耐？今日同大家整合咗5個令下屬心灰意冷嘅原因，快啲睇吓你有冇唔小心做到啦！

1. 唔聽人意見

長期唔聽人意見嘅管理層就好似獨裁者，久而久之做下屬嘅梗係頂你唔順啦。其實下屬對工作有問題同意見嘅時候，作為管理層應該好好聆聽同討論，講真佢比意見都係希望件事好。唔聽人意見又點令下屬信服呀？

2. 推卸責任

有問題嘅時候，上司係應該負起責任定係射比啲細呢？關佢事嘅你射比佢，唔關佢事嘅你又射比佢，做細嘅又點會頂得你順！

3. 阻人收工

我明明就收六點嘅，你五點十一先畀份文件我，叫我今日搞掂佢，之後自己走先？急你唔早啲叫我整？仲有啲臨收工先嗌開會同留低傾兩句，喂收工呀大佬，啫係唔做嘢啦you know？留低係人情唔留係道理，唔應該阻人收工㗎。

4. 搶功勞

明明單嘢你冇份，仲要死攬晒啲功勞上身，我係下屬都頂你唔順啦！下屬做得好，就應該畀返應得嘅獎賞佢哋，而唔係同佢哋搶功勞！

5. 侮辱下屬

下屬做錯嘢係好應該話佢兩句，但唔代表你可以用呢個機會嚟侮辱下屬，必須要注意你嘅用詞！“有冇帶腦返工呀？咁蠢都有！” “做到成Pat屎咁你仲有面返工嘅？” 日日畀人咁話係人都頂你唔順啦。

睇完有冇覺得自己有犯上面嘅問題呢？唔想犯眾憎，就要避開呢啲問題喇！