無論係以前返學，定大個返工，Lunch time都係我地每一日都期待嘅時段。有好多同事，早餐都未食完就開始諗Lunch time食咩，明明仲有好多嘢做，但對Lunch time嘅熱情絲毫未減。Lunch time係我地人生裏面非常寶貴嘅時間，所以保持Lunch time嘅質素至關重要。不過，呢個世界總有人唔識趣，係要滾搞人地個Lunch time。

1. 研究你食咩嘅同事

有一種同事唔知點解好鍾意研究帶飯嘅同事個飯盒。你叮完個飯盒嘅香味會引嚟佢地嘅注意，走過嚟研究你個飯盒。

「哇！好香呀！你今日食咩？」

「好似好好味，可唔可以請我食隻雞翼？」

你心諗其實我食咩又關你咩事？快啲彈開唔好阻住我煲劇。

2. 自己食完飯的同事

每間公司都有一個基本規定嘅食飯時間，不過喺某啲公司入面，唔同部門、職位嘅同事都有佢地自己嘅食飯時間。有啲同事以為自己食完飯，全公司其他同事都食完飯，結果就走去搞其他仲食緊飯嘅同事。好似我地做HR咁，喺個位食緊飯都總會有人入嚟搵我地交嘢問嘢，為咗捍衛自己嘅食飯時間，唯有勇敢地叫佢晏啲再嚟。

3. 鍾意Lunch meeting的人

「不如我地出嚟食Lunch傾吖。」

聽到呢句，你心裡面應該已經組成咗一句充滿廣東話助語詞嘅句子。食飯還食飯，開會還開會。食緊飯點講嘢？講緊嘢又點食飯？呢個建議根本違反物理同生理定律，仲有可能造成消化不良，嚴重嘅甚至會食唔落飯。最重要係，我個Lunch time好寶貴㗎！

4. 唔使食飯嘅老細

傳說中，只有女神可以不食人間煙火。但現實中，原來老細都可以不食人間煙火。如果你有個工作狂老細，你就有可能見過呢種奇景。到咗Lunch time，當大家鳥獸散嘅時候，你老細都仲坐喺度做，甚至下午茶到放工佢都唔使食，但依然有能量工作。如果有一日你Lunch time唔覺意散唔切水，佢可能會捉住你成個Lunch time傾嘢。把口就話「好快㗎，唔會阻你好耐。」點知做完之後，啲鳥獸已經散完返嚟，你嗰日嘅Lunch time就咁燒焦，唯有陪老細修煉成仙。